Torsdag morgon i 04-tida vart det observert ein ulv som kryssa Grandøla like ved riksveg 15 i Oppstryn. Viltkontakt Ingolf Folven har også fått melding om ulv i Glomsdalen og på Flofjellet.
- Det var ein langtransportsjåfør som såg ulven på veg mot Grønfurvika torsdag morgon. Vedkomande som tidlegare har sett ulv på Lesja og andre stader, er sikker på at det var ein ulv som kryssa elva, gjekk over dyrka mark og forsvann opp i skogen ved Grønfurvika, fortel Ingolf Folven.
- Du har fått fleire meldingar om ulv i Oppstryn?
- Ja. For litt sidan vart det sett ulv ved Glomnessetra, og sist søndag var det folk som såg ulv på Flofjellet, nærare bestemt ved Rindalsvatnet, opplyser viltkontakt Ingolf Folven.
Saueeigar Oddleif Erdal bur i området der siste observasjonen vart gjort.
- I morgon skal eg opp i skogen der sauene mine går. Det blir spennande å sjå om der spor etter ulven. seier Erdal til Fjordingen.