Rundt 90 personar stilte på under det første folkemøtet i Stryn kommune knytta til kommunereformen og regionsreformen tysdag kveld.  Dei neste folkemøta skal haldast i Hornindal i dag tysdag, i Olden måndag og i Innvik neste torsdag.

Informasjon om begge reformene

Jørgen Amdam, ordførar i Volda informerte om regionsreformen, medan ordførarane i Stryn og Hornindal, Sven Flo og Stig Olav Lødemel orienterte om kommunereformen, status og tidsplan.

Når det gjaldt det siste, var det særleg intensjonsavtalen som er framforhandla mellom Stryn, Hornindal og Volda som fekk mest merksemd, ein intensjonsavtale som skal godkjennast av Stryn formannskap torsdag og seinare av kommunestyret 28. april.

Innbyggarundersøking og folkerøysting

Rådmann Per Kristian Storevik kunne opplyse at det i Stryn truleg vert gjennomført både innbyggjarundersøking og rådgjevande folkerøysting når det gjeld kommunesamanslåing. Dette under føresetnad at formannskapet 21. april og kommunestyret den 28. april går inn for rådgjevande folkerøysting.

Det er Opinion AS som skal gjennomføre innbyggjarundersøkinga i tida 1.-19. mai. 19. mai  skal det som kjent gjennomførast rådgjevande folkerøysting når det gjeld Ørsta/Volda.

Resultatet frå innbyggjarundersøkinga i Stryn og eventuelt frå folkerøystinga (som no er førebudd) skal bli offentleggjort på same tid. Begge desse er rettleiande. Når det gjeld innbyggjarundersøkinga blir det truleg tre klare alternativ å velje:

1. 0-alternativet

2 . Stryn og Hornindal

3. Stryn, Hornindal og Volda

Rådmannen såg føre seg at kommunestyret gjer vedtak basert på innbyggarundersøking og rådgjevande folkerøysting den 23. juni. Siste frist for kommunestyrevedtak er 30. juni.

-Inga forandring på 150 år

På folkemøtet  tysdag kveld pågjekk orienteringa i godt to timar. I ein snau time til slutt kom det fleire spørsmål frå salen.

Jørgen Amdam, som er ein av dei i landet med mest kunnskap om regionsreformen, orienterte om behovet for endringar:

- Vi ser ein veksande urbaniseringsprosess. Også for Volda kan dette gå gale. Kan ikkje vi byggje makt, blir vi overkøyrt av dei store sentra. Med få unnatak har vi i dag nesten amtsgrensene frå 1866 intakte. Einaste endringa er at Bergen/Oslo har mista status som fylkeskommunar. Etter det har Bergen vore pest og plage for Hordaland. Vi skal bli ca. 10 regionar. Eg har sett på ca. 40 statlege organ. Det er ingen andre grenser som er så sterke som mellom Sogn og Fjordane og Møre og Romsdal når det gjeld slike oppgåver, sa Amdam. Han la til at det i dag var sterkare tverrpolitisk semje om å endre regionsstrukturen. Fylkeskommunale vedtak om samanslåing når det gjeld regionar skal skje før 1. desember. Våren 2017 kjem proposisjon om nye oppgåver og forslag til ny struktur. Frå 1. januar 2020 skal det vere nye kommunar og nye regionar.

Økonomiske tap

Ordførar Sven Flo la i si orientering sterk vekt på Stryn vidaregåande skule:

- Skulen er utruleg viktig for oss. Det er fylkeskommunen som eig han, og det er avgjerande med god dialog med fylkeskommunen. Regionsreformen kan gjere noko med eigarskapen. Det er eit spørsmål kven som eig skulen i 2020, sa Flo. Han la ikkje skjul på at Stryn, Hornindal og Volda kom seint opp som alternativ, men prosessen kunne ikkje kortsluttast no.

- Det ville vore eit hån mot innbyggarane i Stryn kommune. Då hadde dei mista eit alternativ.

Flo gjorde greie for at dersom dei tre aktuelle kommunane vart ståande åleine, ville det samla økonomiske tapet for dei bli på 255,5 millionar kroner over 17,5 år. Dette vel og merke dersom forslaget til nytt inntektssystem gjeldande frå 1. januar 2017 skulle bli vedteke. For Stryn åleine vert tapet på 5,7 mill. kroner per år etter KS sine tal.

- Har fått krava innfridd

Hornindal-ordførar Stig Olav Lødemel sa at Hornindal gjennom  intensjonsavtalen med Stryn og Volda hadde fått innfridd krava:

- Vi strekk ikkje til kvar for oss. Arbeidsoppgåver vert tredd nedover hovudet på oss. Fylkesmannen kjem med avvik og vi lukkar dei etter beste evne. Vi slit med rekruttering på bakgrunn av at her ikkje er fagmiljø, konkurrerer med andre kommunar om dei same folka. Det dreier seg om det folk forventar kommunen skal levere. Saman blir vi sterke, sa Lødemel mellom anna for å illustrere situasjonen.

- Møre og Romsdal må svare

Debatten som fylgde vart opna av fylkestingsrepresentant Sonja Øvre-Flo (H) som to gonger poengterte at ho ville ha snarleg svar frå Møre og Romsdal knytta til fylkestinget i Sogn og Fjordane sitt vedtak om å ville greie ut om ein større vestlandsregion med Møre og Romsdal på laget. Dette ville ikkje Jørgen Amdam kommentere.

Odd Nygård spurte om fristen for vedtak om samanslåing var absolutt for ikkje å misse inntekter. Til dette fekk han relativt klare ja-svar på frå Amdam/Flo, særleg om det ikkje var særlege forhold knytta til fylkesgrenseproblematikken.

Anne Margrete Tonning (H) tykte det var håplaust med kommunereformarbeid når ein ikkje kjende utfallet med nye regionar. Ho spurde kva som skjedde dersom under 50 % deltok i rådgjevande folkerøysting.

Stryneordføraren vedgjekk at prosessen ikkje var synkron og at spørsmåla måtte takast opp i formannskapet torsdag.

- Ikkje vi som kan opne døra til Eid

Klemet Bø (KrF)  oppmoda om at spørsmål og tidspunkt for innbyggarundersøking burde opplysast i Fjordingen på førehand.

Olga Johanne Eikenæs Frøholm ville vite kva Hornindal kom til å velje om Ørsta/Volda ikkje ville ha med Stryn. Til dette svara Hornindal-ordføraren at han skulle vere forsiktig i å foregripe begivenheitene, men at han trudde det var fleirtal både i kommunestyret og folket for å gå nordover. Til dette repliserte Flo at Stryn då berre hadde 0-alternativet om ikkje kom ei opning i tolvte time for Stryn. Amdam ville ikkje spå om Ørsta sitt syn på det.

Eikenæs spurde om det var slik at Eid og Gloppen måtte banke på Stryn si dør om Stryn skulle få innpass:

- Kvifor er det ikkje like aktuelt å banke på deira dør for ikkje å risikere å bli åleine?

- Det er ikkje vi som kan opne den døra. Dei skal avklare seg imellom. Det er utgangspunktet, sa Flo.

- Fryktar for Stryn vgs

Ove Aarskog var uroa for Stryn vgs:

- Skulle 12-15 elevar i kvart årskull gå nordover (totalt rundt 45 elevar), er det skummelt for skulen sin eksistens.

Her svarte Flo at det blir lagt opp til fritt skuleval, og tilboda vil avgjere. Det er ikkje gitt at elevane vil velje Volda framfor Stryn.

Honndalsordføraren gjorde det klart at skulle Stryn bli kopla av Ørsta, Volda, Hornindal, ville ikkje det vere Hornindal sin feil.

Jens Hogrenning meinte salen burde vore full i kveld og oppmoda om å "piske folk inn" på dei neste folkemøta,  i Olden og Vikane.

- Inga katastrofe å bli åleine

Jon Olav Kvamme såg fornufta i å få vekk fylkesgrensene for å kunne ha eit "nært samarbeid" med kommunane på Sunnmøre. Han håpa Hornindal ville velje Stryn, men såg ingen katastrofe i om Stryn skulle bli åleine.

Jørgen Amdam meinte at utan store og robuste kommunar,  ville vår region tape i forhold til store maktsentra som Førde og Ålesund, både når det gjeld sjukehus, høgskule og vidaregåande skular. Også Jan Træen såg at distrikta ville tape mot slike sentra.

Nordfjord- alternativa vart borte

Avslutningsvis kom spørsmålet igjen opp kvifor Nordfjord-alternativa stranda:

- Det ville vore interessant å høyrt om årsaka frå ein eidar sin ståstad, sa Ove Aarskog.

Her nekta honndalsordføraren for at spørsmålet stranda på Stryn:

- Flo skal ikkje ha skulda. Alfred Bjørlo (ordføraren på Eid) har i ettertid bekrefta at vi i fellesskap valde å avslutte forhandlingane, sa Lødemel. Flo på si side sa at "inntil Eid skulle finne på noko anna, er diskusjonen med Eid avslutta".

Torstein Tvinereim (V) understreka kor viktig det no ville bli med knapp tid framover å få fram oversiktleg og god informasjon.

Ole Johnny Nesdal (Sp) hevda at det burde vore brukt meir tid på alternativ i Nordfjord og at folk kunne sagt si meining om det i ettertid. Han var klar på at folkerøysting måtte til.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                 i

2017.