- Dei tre para frå Fjelljom starta i kvar sine «heat», og gjennomførte masurkaen på god måte med lette og stødige dansetrinn, skriv Leif Vinsrygg til Fjordingen. Han er på Landsfestivalen i gammaldansmusikk i Steinkjer og følgjer med på musikarane og dansarane frå Stryn.
Fredag konkurrera dansarane frå Fjelljom i lagdans. No er det opp til dommarane å avgjere om dei har kvalifisert seg for finaledans i morgon, laurdag.
- Fjelljom har vore med og laga historie, sa ein nøgd spelemann og dansar, Arne M. Sølvberg etter at lagdansen var vel gjennomført.
- Det var laget vårt som kom med framlegg om å innføre lagdans som ei tevlingsgrein under Landsfestivalen. At vi i tillegg hadde startnummer ein, set ein ekstra spiss på deltakinga. Og dansen gjekk betre enn nokre av oss trudde på førehand. Skepsisen gjekk på om vi ville greie å halde ringen då vi starta med bytereinlendar. Men det gjekk fint, og dette var ei kjekk oppleving.
Dei dansa etter reinlendaren «Fossekallen» av Severin Kjærland.
