Om lag 80 publikummarar fekk oppleve ein flott konsert i Stryn kulturhus tidleg laurdag kveld. Unge lokale talent framførte musikk på alt frå gitar, bass, trommer, klarinett, flygel og fele til rein vokal.
Programleiar Torstein Tvinnereim spurde mellom andre Mats Hopland om korleis det er å vere elev ved kulturskulen.
– Det er veldig kjekt. Eg vil anbefale det for fleire, fastslo Mats. Sjølv spelte han mellom anna «Å kunne æ skrive» og jazzinspirerte «Blue Monk» på klarinett saman med tidlegare rektor for kulturskulen, Ketil Rasmussen på trekkspel.
– Mektig imponert over nivået
Det var lett å la seg engasjere som publikummar laurdag. Nivået var jamt høgt gjennom eit godt gjennomført arrangement. Få kan formidle publikumsopplevinga betre enn ordførar Sven Flo.
– Det har vore heilt fantastisk å sitte i salen og sjå på det som har skjedd der. Eg er mektig imponert over nivået. Dette viser at kulturskulen har livets rett, sa ein svært entusiastisk stryneordførar.
Ny haust i nye lokale
Ordføraren poengterte at det vil bli ny og frisk kultursatsing i nye lokale i kulturhuset.
– Vidare vil vi forsøke å få på plass eit desentralisert tilbod slik at vi når ut til alle i Stryn kommune, sa Flo.
Han fekk oppgåva med å dele ut årets elevpris blant sju nominerte elevar.
– Alle er like gode, så vi må avgjere dette med loddtrekning, sa Flo som trakk namnet til flygelspelar Lene Egseth opp av kurven.
– Ein blir jo litt motivert av ein slik pris, sa Lene til Fjordingen.
Ho var ikkje den einaste som fekk heider og ære denne kvelden.
– Nye talent veks fram kvart år, men hadde vi ikkje hatt dei lærarane vi har, så hadde vi ikkje fått slike resultat, sa kulturleiar i Stryn kommune, Myrtel Thomassen og trakk fram Linda Gytri og Ingrid Heieren som fekk blomster og ein velfortent applaus.