Stryn banka Balestrand heile 9-0 på Kreklingen stadion i Balestrand måndag, og etter 0-1 til pause rann måla inn i 2. omgang. Karoline Flo stod for fire av måla i kalassigeren. Hedda Vatn Øvreberg var ikkje stort dårlegare og sette inn tre mål. Øvrige scoringar sytte Katrin Oppheim og Saeideh Tajik for.
Dermed fekk Halvard Bøe sitt lag revansje etter 0-4 mot Førde fredag.
- Vi hadde litt å bevise i kampen mot Balestrand, og vi var bestemt på å finne tilbake til det som har fungert godt tidlegare i år, seier trenar Bøe til Fjordingen.
Allereie fredag er det klart for nytt 3. divisjonsoppgjer for Stryn. Då møter dei Høyang heime på Stryn stadion.
- Den kampen gler vi oss til, seier Bøe.
Stryn held framleis 2. plassen på tabellen med sine 13 poeng på seks kampar. Studentspretten toppar med 18 poeng på åtte kampar.