Koret heldt først workshop for korsongarar frå distriktet og deretter to konsertar. Søndag heldt dei konsert på Hoven. Konsertane i Oldedalen og Loen var dei to siste av ein serie på ni.
Unik velkomst
Etter kvart som publikum fann vegen til Blåfjellhallen, vart dei møtt med trommeslag frå taket med bakgrunnsmusikk frå Vollefossen.
Svein Fjermestad har spesialisert seg på slåttetromme.
Bergtekne
Repertoaret på konserten laurdag kveld var henta frå den rikhaldige norske folkemusikktradisjonen. Folkemusikken i Norge har røter langt tilbake og er dokumentert i litterære kjelder frå norrøn tid. Blåfjellhallen er bygd opp kring store steinar som rasa ned frå fjellet for 6.000 år sidan. Når vi får vite at teksten til «Astrid mi Astrid» er 2.000 år gammal, blir det magi. Bokstaveleg talt så vart publikum bergtekne frå første tone.
Flott koreografi
Kammerkoret hadde også ein flott koreografi i tillegg til samsongen. Dei brukte heile hallen. Plutseleg stod koret spreidd rundt i hallen for så og ende opp på podiet fram for publikum igjen.
Samsong
Dirigenten Jon Flydal Blichfeldt fortalde til Fjordingen at songarane har lang erfaring frå andre kor og at dei har krav om opptaksprøve og notekunnskap. Songarane må også ha god rytmesans og ikkje minst lære seg samsong.
Erling Briksdal og Margaret Venøy Flo var to av dei som var med på workshopen laurdag ettermiddag. Det var svært lærerikt, sa dei begge.
Briksdal nemnde spesielt teknikken med å lære seg samsong.
– Sjølv om to syng same tone, er det forskjell på stemmene. Til slutt kunne ein ikkje høyre den eine stemma framfor den andre, sa Briksdal som har årelang erfaring som dirigent for dei fleste kora i distriktet vårt.
Både cello og slåttetromme forsterka enkelte nummer. Folkemusikken har inspirert mange komponistar også i moderne tid.
Jan Magne Førde sin bruremarsj med slåttetromme og ei fantastisk songglede, var mektig.
Avslutningsnummeret var «Ned i vester soli gladar». Ein kveldssalme frå Eid med tekst av Anders Hovden. Så nydeleg; «Takk for mat og takk for glede, gjev oss hjartefred og ro». Sistnemnde noko Ole Bull Kammerkor verkeleg gav publikum laurdag.