Det vart dundrande trampeklapp og ståande applaus for «Ull innerst i sjela» si nypremiere i Gamle Innvik Ullvarefabrikk fredag. Laurdag og søndag er det klart for nye framsyningar.
«Ull innerst i sjela» er ein historisk basert musikal der du blir kjent med industrieventyret i Innvik, historia til Innvik Ullvarefabrikk frå oppstarten i 1890 og fram til det vart bygd ny fabrikk på 70-talet.
Teksten er skriven av Torstein Tvinnereim, som også er produsent. Musikken er skriven av Jon Are Steen, som også er arrangør og musikalsk leiar. Koreograf er Candice Bredesen. Regien er denne gongen ved Anders Alvaro Gjengedal Nydal, men aktørane sender i programmet også ei helsing til den første regissøren, Arild Bøe, som gjekk bort rett etter oppsetjinga hausten 2021.
Flotte stemmer, fargerike og truverdige karakterar, velkomponert og vel framført musikk og gode tekstar, flotte ensemblenummer og ei rekkje imponerande solistar gjer dette til ei stor forestilling.
Det er farleg å byrje å nemne enkelte aktørar i ein slik samanheng, men Eivind Kandal som Wald Skaaden og Sølvi H. Nygård som Ella gjer stort inntrykk. Det same gjer Josefine Agathe Hove som spinneritausa Jensine. Ho gjer ei imponerande tidsreise på 60 år i sin karakterfigur.
Og så er det alle dei andre, som i fellesskap eller i fine karakterroller imponerer med song, dans og godt skodespel. Djupt gripande, til ettertanke eller med glimt i auget og sving i stega. Musikalen nyt godt av å ha eit svært friskt og ungdommeleg lag som boblar av talent.
Til nypremiera fredag måtte diverre Anne-Marta Vinsrygg Vadstein melde sjukdomsforfall, men til alt hell har ho ei storesyster, Bjørg Jorunn, som også er med i musikalen, og som utan å blunke steppa inn som superreserve og gjorde ein imponerande innsats.
«Ull innerst i sjela» er eit fantastisk stykke industrihistorie der musikk, tekst og scenebilete saman dannar ein fargerikt vev.
To tidsperiodar flyt over i kvarandre, menneskeskjebner blir vevne saman og alt skjer innanfor dei same veggane der det heile starta og pågjekk.
På veg ut i sommarkvelden var det uråd å ikkje kaste eit blikk på dei store maskinene langs veggane og sjå om dei stod der, spinneritausene. Og om dei er borte no, så lever historia deira vidare gjennom ein musikal som lever opp til namnet: Han festar seg i sjela.