Vi beklagar at SV ikkje stiller liste ved årets kommuneval. SV er eit parti med mange gode saker også på kommunalt nivå, men har som nemnt valt å ikkje stille til val i år.
Stryn kommunestyre treng absolutt representantar som står til venstre for Arbeidarpartiet. Vi treng folk i kommunestyret som vil bevare velferdsstaten, som vil gå mot ytterlegare privatisering av offentlege tenester, som vil kjempe mot dei aukande skilnadane i landet vårt og som tek klimakrisa på alvor og ikkje berre tenkjer uhemma vekstpolitikk.
Partia på høgresida, som sverger til marknadsliberalistiske prinsipp, er ikkje i stand til å løyse dei store utfordringane vi no står overfor globalt, nasjonalt, regionalt og lokalt. Mange fine ord, men det er blant desse partia langt til reell handling for å sikre ei bærekraftig utvikling også i Stryn kommune.
Etter ei nærare vurdering, har SV Stryn bestemt seg for å anbefale våre veljarar og andre til å stemme Raudt ved årets kommuneval. Partiet har mange gode folk på si liste og mange saker vi kan støtte. Vi har tru på at f.eks 1. kandidat på Raudt si liste, Anders Hamre Sveen, kan bli ein god kommunestyrerepresentant som greier å seie i frå og som vil kjempe for mange saker i kommunestyret som SV stiller seg bak.
Ein del veljarar vil nok vegre seg for å stemme Raudt som dei ser på som eit vel «radikalt» alternativ. Rikspolitisk har SV, trass i stor usemje i ein del saker, hatt eit godt samarbeid med Arbeidarpartiet. Vårt 2. val også i lokalpolitikken er derfor ei stemme til Stryn Ap.
Hans-Petter Galtung
leiar i Stryn SV