Anders Svor Museum er største kunstskatten i kommunen, og ein må prøve mykje før ein vurderar stenging av museet.
Det første Viti må gjere er å vurdere alle tiltak som kan skaffe pengar i kassa. Ein slik kunstskatt må vere viktig for alt reiseliv i heile regionen. Difor må Viti samarbeide med reiselivsaktørar både om markedsføring og tilrettelegging for besøk. Kan det vere ein ide å ha ein lokal guide, som på timebasis kan vise rundt grupper i museet utanom opningstid? Det må vere eit fantastisk tilbod til grupper som overnattar både på hotellet på Grodås og omliggande hotell. Kanskje kan Viti samarbeide med Havila Raftevold Hotell om kurs i kunst med utgangspunkt i Anders Svor Museum? Alt må prøvast!
I området har vi fleire folkehøgskular, vidaregåande skular og ikkje minst Høgskulen i Volda. Her må det vere gode moglegheiter for prosjektarbeid med utgangspunkt i museet. Eg er samd i at museet ikkje er særleg tilrettelagt for born, men i små grupper kan det vere spennande å ta med born i museet og høyre deira reaksjonar på alt det vakre som er der. Kanskje det kan gje idear til nye tiltak?
Museet er eit fantastisk konsertlokale som ein bør bruke meir. Det er ei spesiell stemning å sitje der mellom skulpturane og høyre på vakker song og musikk.
Vi har berre nokre få slike museum i Noreg. Det representerer ein viktig del av kunsthistoria vår. Vi er forplikta til å ta vare på denne arven og vise den fram for ålmenta.
Viti må saman med kommunen, fylkeskommunen og Kulturdepartementet finne ordningar som sikrar drift av desse musea. Her må Møre-benken på bana!
Brynhild Lund Notøy
1. kandidat Volda Venstre