Ved fylkestingsvalet er det viktig å sikre kandidatar frå heile fylket. Eg er frå Nordfjord og står på 5. plass på Vestland SV si liste. Og om du og andre veljarar vil, så kjem eg inn på fylkestinget.
Ein fylkestingsrepresentant skal vere ein representant for heile fylket, samtidig er det lurt å få ein representasjon som også gjev geografisk spreiing. For Nordfjord er det viktig at vi sikrar framtida for dei vidaregåande skulane, at vi får våre fylkesvegar, festivalar, næringstiltak og kulturtiltak på prioriteringslistene. Dessutan er det viktig å gjennomføre ei tannhelsereform som styrkar tannhelseklinikkane i Nordfjord, for å nemne nokre saker. SV vil ha trygge bruksvegar med gul stripe midtstripe, og ta igjen det store etterslepet på vedlikehaldet av vegnettet. Til det trengst eit nasjonalt løft og ei tydeleg prioritering av vegmidlane. Ei prioritering vi i SV gjer både i fylket og i Stortinget.
SV går til val på ein desentralisert skulestruktur. Eg vil arbeide for at vi framleis har fire skular i Nordfjord. For å sikre dette er det svært viktig å halde på og utvikle nærskulemodellen, og å avgrense talet på dei kommersielle private skulane i Bergen. Karakterbasert opptak eller fritt skuleval som høgresida ropar om, kan føre til sentralisering av fleire elevplassar til Bergen. Då bør vi heller satse dei store pengane på gode vidaregåande skular i heile fylket som gjev lokale ringverknadar for næringslivet i bygdene våre, med kortare reiseavstandar for elevane.
Hege Lothe, Gloppen
5. kandidat for Vestland SV