Det å bu i ein tilfredsstillande bustad er ein menneskerett. Dette krev politisk vilje for ein bustadspolitikk som sikrar alle like mogelegheiter til ein stad å bu. Mesteparten av ansvaret og jobben som må gjerast for å få snudd den særs skadelege bustadspolitikken i Noreg fell openbart på Stortinget. Det er berre dei som kan gjenreise Husbanken som ein institusjon som står i front for ein omfattande og sosial bustadspolitikk, slik Husbanken faktisk var ein gang. Det er Stortinget som har nok økonomiske musklar til å få på plass ein omfattande ikkje-kommersiell utleigesektor med billige utleigebustadar.
Det er likevel ting som kan gjerast på kommunalt nivå i Stryn. Det er slik Raudt Stryn ser det til dømes ønskeleg å nytte det gamle e-verkbygget til tidlegare Stryn Energi til å opprette eldrebustadar. Det ligg godt plassert for eit slikt føremål. Det som er igjen av verksemd i bygget kan ein flytte til ein annan plass.
I Bøagrenda var det ein gong barnehage, no står bygget berre å forfell. Her burde det kunne gå an å få brukt dette området til noko, til dømes kommunale bustadar til låg leige. Her er fleire bygg rundt omkring i Stryn kommune som står ubrukt året rundt. Kommunen burde arbeide for å få ei fullstendig oversikt over kva for bygg som står heilt ubrukt året rundt, og freiste å få gjort noko med dei.
Stryn kommune bør vidare freiste å få på plass eit tettare samarbeid med Husbanken og aktivt nytte mogelegheita som kommunar har til å søkje på tilskot til bustadsosiale tiltak og tilskot til bustadtiltak i distrikta. Skal Stryn kommune kunne søkje på midlar til slike tiltak, som er noko som kommunen bør gjere, så må det budstad-sosiale arbeidet vere forankra i kommunen sin planstrategi og ein treng òg planar for heilt konkrete prosjekt som til dømes nye måtar å samarbeide med utbyggjarar på for å sikre at prosjekt med fleire bustadar blir bygd i distrikta.
I juli kunne ein lese i Fjordingen at fleire bedrifter innan bygg- og anleggsbransjen står i fare for å stå utan arbeid til hausten. Ein meir offensiv bustadspolitikk frå kommunen si side kan vere medverkande til å snu denne trenden.
Anders Hamre Sveen
leiar av Raudt Stryn