I våre alternative budsjettframlegg i fylkestinget i Vestland har Raudt Vestland gått inn for å styrke budsjetteringa for dei fylkeskommunalt eigde vidaregåande skulane i Vestland, vi sett mellom anna av 20 millionar til å styrke kontaktlærar- ressursen. Vi må styrke laget rundt eleven, og fekk gjennomslag for eit pilotprosjekt med oppstart av eit lågterkseltilbod for psykiske helsetenester for elevar og lærlingar som no er starta i samarbeid mellom Firda vgs ( fylkeskommunen) og Gloppen kommune. Dette er noko vi vil hauste erfaringar med, og utvide til å gjelde fleire stader. Vi går i år til val på å oppretthalde alle dei vidaregåande skulane i Nordfjord, inkludert Stryn vidaregåande skule. Vi vil dessutan òg oppretthalde alle dei andre fylkeskommunale vidaregåande skulane i Vestland.
Raudt Vestland meiner at unge skal ha eit vidaregåande skuletilbod nær heimstaden, og eit gratis varmt måltid kvar dag. Erfaringar viser at eit desentralisert skuletilbod gjer at fleire lettare gjennomfører vidaregåande opplæring. Difor må kampen for dei mindre skulane og mot sentralisering halde fram.
Raudt Vestland arbeider for å sikre breidde og desentralisering innan fylket sitt opplæringstilbod, samt sikre ei geografisk styrt inntaksordning som sikrar elevane plass på nærskulen sin. Raudt Vestland vil vidare opprette fleire yrkesfaglege klassar for å imøtekomme det lokale behovet for fagarbeidarar, ikkje minst helsefagarbeidarar. Dessutan vil vi satse storstilt på «fagbrev på jobb» ordninga, slik at fleire av dei som allereie jobbar i omsorgssektoren, får høve til å ta fagbrev. Vi treng fleire varme hender i omsorgsyrka, ikkje minst må vi behalde dei vi allereie har!
Jeanette Onarheim Syversen
1. kandidat for Raudt Vestland