Sommaren er på hell, skulane har byrja, plommene er modne, snart er det haust! Ikkje før er sommarferien over før reiseselskapa minner oss om at vi må hugse å bestille billettar til haustferien! Det tykkjest rart for meg som mest aldri har kunne ta verken sommarferie, haustferie eller vinterferie. Slik er det å vere liten sjølvstendig næringsdrivande. Vi kunne kanskje lure oss til nokre dagar når sesongen var over, ta «sommarferie» om vinteren, kanskje reise til «Syden» for å få sommar i lag med ungane med bading og sol.

No har eg vore pensjonist i mange år, 10 år faktisk, og vi har nettopp vore ei veke i Bulgaria på Svartehavskysten i Ravda/Nesseby. Ei fantastisk veke, sol og blå himmel, nokolunde passeleg varme og flotte lune kveldar. Eg likar eigentleg best « T-skjorte ver», og er ikkje overbegeistra for sandstrender. Ein kan gjerne spørje seg kva eg eigentleg vil til Syden for? «Du som eigentleg ikkje likar sol, sterk varme, og ikkje sandstrender!» «Ja, sei det!» Men når vi vart påspandert og famiien ville ha oss med, så er det jo uhøfleg å takke nei og! Lat det vere sagt med ein gong - når du kjem opp i åra og ikkje er så god på data og digitale medier, så er det ikkje så enkelt å skulle bestille billettar sjølv heller! Når ein skal gjere alt sjølv, alt går på appar! Alt skal gå så fort, du skal sjekke inn og sjekke ut og mykje står med lita skrift! Alt skal gå digitalt, eg likar å ha billetten i handa. i tilfelle telefonen er utlada eller du ikkje finn att reisedokumenta på skjermen. Alt skal gå så fort!

Vi fann ut at vi skulle køyre til Otta og ta toget til Gardermoen denne gongen for då kom vi direkte på flyplassen. Der vart vi møtt av familien som hjelpte oss med innsjekkinga, alt gjekk fint og vi hadde som sagt nokre flotte dagar i Bulgaria. Vi budde som i ein oase med flott balkong rett ut mot eit stort og eit lite badebasseng, med solsenger og solparasollar til fri benyttelse. Då var det eg tenkte på Stryn sentrum ein varm sommardag. Her var det symjebasseng utanfor kvar blokk og tre min å gå til ei fleire kilometer lang, flott sandstrand! I juli i år var det i grunn ikkje så gale her heime, for det har vel stort sett regna størsteparten av månaden og ingen badetemperaturar har vel frista. Ungar elskar vatn og bading. Skal vi verkeleg bli eit sommarreisemål for barnefamiliar, så treng vi eit utendørs badebasseng/badeland i Stryn sentrum, vi har ikkje badestrand, det er livsfårleg å parkere ved Staveneset, (ikkje er heller «stranda» der noko å skryte av), det er ikkje mykje parkering ved Avleivikja, ved Dispaholmen er ein vel på privat grunn.

Vel har vi ein flott symjehall på Tonning, men den er ikkje open kvar dag om sommaren og det er då noko spesielt med å bade ute! Eg er fullt klar over at det er ikkje lovpålagt med eit utendørs sømjebasseng i kommunane, men som den reiselivskommunen Stryn er, så har det noko med tilbod og trivsel å gjere. Det å kunne få folk til å stogge over nokre ekstra dagar - og ikkje minst til glede for dei fastbuande som ikkje kan, eller gjerne har råd til å reise vekk midt på sommaren (syntest det var snakk om tidlegare i sommar at det var så mange som ikkje hadde råd til å reise på ferie i år). Hjartesukk!

Som nemnt, vi reiste med tog frå Otta då vi skulle på ferien vår. Vi var ein del som måtte «eit nødvendig ærend» på togstasjonen. Stasjonen er ubetjent, men toalett var der, reint og fint med rikeleg papir! MEN du skulle bruke visakortet ditt og «tæppe» for å få betalt og kome deg inn. Alle veit at det er litt forseinking i automatiske dører og ei av damene som det tydeleg hasta for nærmast ropte: «Går ikkje døra igjen? Eg MÅ og toget går snart! Eg sit ikkje her for opa dør!» Det gjekk bra! Ikkje alle likar å låse døra heller, men du hadde ikkje noko val, måtte berre håpe på at ein trykte på rette knappen, så døra gjekk sakte opp att! Ved felles hjelp gjekk det fint, men ei måtte berre springe for å nå toget sitt!

Mest alt er automatisert og digitalisert i vår verden no ser det ut til. Eg seier stakkars dei som ikkje har nokon i huset dei kan spørje når ein treng hjelp. Heldigvis at ein på dei fleste plassar kan betale med kontantar enno, så sant ein får tak i kontantar då! Vipps er utruleg lettvint, men eg må tilstå at eg ikkje har heilt kontrollen i denne papirlause verda! Før var det på biblioteket at ein skulle vere stille. Men eg må seie at eg vart skræmd på flyplasssen denne gongen. Alle går med mobilen sin i handa og tilsynelatande les på den, inn og ut gjennom dører - godt at dørene opnar seg automatisk! I køar og i ventehallane sit folk musestille og ser på telefonen sin, ingen snakkar eller ser på sidemannen sin, og alle har kvite joggesko! Ei dame frå Sunnmøre løyste soduko og eg løyste kryssord - vi snakkast!

Det ser ikkje ut til at folk les aviser lenger heller. På restaurantar sit gjerne folk og glor på telefonen sin medan dei ventar på maten sin, snart kan vi vel ikkje skrive lenger heller på eiga hand - det er då allskens rette- og hjelpeprogram. Irriterande! Eg vil tenkje sjølv!

Snart er det kommune- og fylkestingsval. Då vi kom heim frå «drømmeferien» vår - etter rett nok å ha site verfaste på Gardermoen i nesten to døgn med bilen på Otta, låg alle valprogramma på kjøkenbenken. Det hadde visst vore fellesutsending. Eg las gjennom alle, mange gode formuleringar, alle vil mykje og har gode hensikter. Eg er einig i litt med alle! Eg har imidlertid mitt parti, sjølv om eg ikkje er einig i alt dei skriv heller! Etter å ha lese i gjennom alle programma, sit eg att med ei «overskrift» i Høgre sitt program som eg hugsar: «På lag med dei som skapar jobbane!»

Ein må setje næring framfor tæring, ein floskel vil kanskje mange seie, men det er det same med deg som privatperson, du må ha pengane før du kan bruke dei!

I Høgre sin ideologi står folkestyret, eigedomsretten og den personlege fridomen høgt - og dette gjer at eg har stemt Høgre i alle år, kanskje bortsett frå første gongen eg stemde, då trur eg at eg stemde Sp - som far min og eg trur mor mi og gjorde! Bondeyrket er då også ei næring. Ved kommunevalet stemmer ein gjerne også på personar meir enn ved fylkestingsval og stortingsval. Uansett meiner eg at alle må bruke stemmeretten sin, vi er heldige som har fleire lister å velje på!

Å stille til val på ei liste er ei samfunnsplikt, meiner no eg, vi treng alle slags menneske og folk i alle aldrar! Eg tenkjer ofte på kva tidlegare stortingsmann og ordførar Paul Svarstad sa på det første fylkesårsmøtet eg var på på 70/80-talet. Ein stod framfor ein nominasjonsprosess og han sa dette: «Hugs på folkens, når de no skal til å spørje folk og nominere: Det er den konservative arbeidaren som er den mest trufaste høgreveljaren!» Det har eg tenkt på ofte, han hadde truleg rett, men heldigvis har vi hemmelege val i landet vårt! Vi har fridom og vi har fridomrett til å stemme på den vi vil! God seinsommar - gjer di borgarplikt - gå og stem! Godt val!

Anne Margrete Tonning