Ved valet på bispedømmeråd i Bjørgvin er det i 2023 fire lister med kandidatar. Dette innlegget er sendt til lokalavisene i Sogn, Sunnfjord og Nordfjord, som eit felles innlegg frå dei tre kandidatane frå «gamle» Sogn og Fjordane som står på Nominasjonskomiteens liste til valet på nytt bispedømmeråd.

I motsetnad til kandidatane på dei andre listene har vi ikkje eit felles utgangspunkt i ein organisasjon med eit gitt program og spesielle kampsaker. Likevel har vi mykje felles: Vi er alle foreslegne av folk som kjenner oss – dei fleste av oss etter innspel gjennom dei lokale sokneråda, og som veit kva vi brenn for og kva vi frå før av har gjort som medlemer av den kyrkjelyden vi tilhøyrer.

Vi er alle vurderte av ei nominasjonsnemnd, sett saman av valde representantar frå alle prostia i Bjørgvin. Lista vi står på, speglar på mange måtar det mangfaldet ein finn i kyrkja vår.

Det betyr at vi er litt ulike kvarandre. Vi har litt ulike røynsler og referansar, og tenkjer kan hende litt ulikt med omsyn til korleis vi skal løyse ulike oppgåver.

Men vi har samanfallande syn i mange saker som er viktige for kyrkja, både i dag og i tida som kjem. Vi meiner det er viktig å leggje vekt på alt som bind Den norske kyrkja saman, i staden for å bruke mykje tid og krefter på saker det er ulikt syn på. Og ikkje minst har vi stort engasjement for den kyrkja vi er ein del av.

Den norske kyrkja er inne i ein omstillingsfase, der ein må leggje til rette for eit godt samarbeid mellom prestetenesta, dei lokalt tilsette og dei lokale tillitsvalde. Ei tydeleg avklåring av roller med tilhøyrande ansvarsområde og mandat vil vere eit viktig tiltak, og vi vil arbeide aktivt for å bidra til å få dette til.

Den nye Lov om tros- og livssynssamfunn uttrykkjer i § 10 ei klar overordna målsetjing om at «den norske kirke forblir en landsdekkende og demokratisk evangelisk-luthersk folkekirke». Eit viktig tiltak for å leggje til rette for dette, er å sjå til at alle som kan stemme ved val på sokneråd og bispedømeråd og som ynskjer det, enkelt kan få avgitt si stemme. Nominasjonslista støttar difor opp om ei valordning der folk i tillegg til å stemme i samband med gudstenester, kan avlegge stemme digitalt, og at det vert oppretta stemmelokale i rimeleg nærleik til stemmelokala for kommune- og fylkestingsval.

Kyrkja og kyrkjeleg tilsette er til tider blitt kritiserte for å vere «politiserande». Einskilde ser ut til å meine at kyrkja ved å uttale seg om politiske spørsmål går ut over mandatet sitt. Nominasjonslista vil oppmuntre til at kyrkja bidreg med etisk grunna synspunkt i slike saker, og er tydeleg på desse. Det vil vere i tråd med kyrkja sitt mandat til å fronte dei verdiane kristen tru og tanke er tufta på. Samstundes er det viktig at kyrkja på generelt grunnlag er varsam med å setje ulike politiske løysingar opp mot kvarandre. Det vil vere å gå ut over det kyrkjelege mandatet og inn i ansvarsområdet for styringsverk og dei politiske partia.

Auka kunnskap om utviklinga av klimaet på jorda har godtgjort at menneskeleg aktivitet har hatt og framleis har stor påverknad for levekåra til oss som bur på denne planeten. Vi veit at det er viktig å gjere store endringar, og det raskt. Vi veit også at desse endringane vil kunne påverka liva våre, kan hende på måtar som vi ikkje likar. Dette kan føre med seg ein risiko for at naudsynte, men upopulære, tiltak vert utsette eller ikkje gjennomført.

Kyrkja bør vere ei tydeleg stemme som tek opp den situasjonen vi faktisk står i, påpeikar det ansvaret vi har som forvaltarar av Guds skaparverk, og ikkje minst kan understreke at å halde fram med eit ikkje berekraftig forbruk, ikkje naudsynleg betyr god livskvalitet.

Gjennom snart to tusen år har kristen tru og tanke blitt formidla gjennom ord, musikk og bildande kunst. Slike kultur-uttrykk har vore og er svært viktige bidrag til at kristendomen framleis er levande i samfunnet vårt. Den kristne kulturarven har vandra gjennom tidsbolkar, over landegrenser, og mellom menneske i ulike sosiale lag. Den har vore, er, og kan framleis vere, samlande i eit samfunn som ser ut til å verte meir og meir oppsplitta.

Det er difor viktig at den kristne kulturarven vert hegna om og får gode vilkår i kyrkjelydane våre. Forutan å vere ein viktig samanbindande faktor i den kristne fellesskapen, kan kristne kulturuttrykk vere ein fin innfallsport for folk som kan hende kjenner seg litt framande for kristent tankegods.

Som kandidatar på Nominasjonskomiteens liste til val av bispedømmeråd har vi rett og plikt til å ha våre eigne meiningar om kyrkjepolitiske saker, men vi ønskjer å lytte til innspel frå kyrkjelydane – spesielt gjennom dei valde styringsorgana på lokalt nivå – sokneråd og kyrkjelege fellesråd.

Vi har ei særleg oppmoding til medlemene i Den norske kyrkja i Nordfjord, Sunnfjord og Sogn: Delta i kyrkjevalet – bruk røysteretten både for sokneråd og Bispedømmeråd og bruk gjerne Nominasjonskomiteens liste! Godt val!

Jostein By, Stryn (kandidat nr. 4)

Ingeborg Watne Flatland, Sunnfjord (kandidat nr. 10)

Torild Teige Strand, Solund (kandidat nr. 14)