Etter at vi fekk framlagt kommunebarometeret,fekk eg lyst til å dele nokre tankar om utvikling av Stryn. 17. plassen samanlag, og ikkje minst 6. plass på barnehage, er svært godt, men vi er ikkje på nokon måte i mål. Her er framleis mykje å ta tak i.
Vinteren 2022, i samband med politisk vedtak om busjett 2023 og økonomiplan 2024-26, vart det starta opp ein organisasjonsutviklingsprosess i Stryn kommune der vi både skal effektivisere prosessar for å spare pengar og tid, men ikkje minst tilpasse kapasitet og kompetanse i høve dagens skjerpa krav og forventningar. Same kva vi jobber med så handlar det heldigvis mest om folk, deretter prioritering, system, rutinar med meir. Organisasjonsutvikling er aldri ein «quick fix» , men derimot ein prosess over tid som vil gje gradvis forbetring.
I september 2021 starta Stryn kommune eit leierautviklingsprogram som har gått over tid med fokus på leiarrolla og verkty for å jobbe systematisk på ulike områder og situasjonar.
Vi nærmer oss no ei avslutning på fase 1 i organisasjonsutviklinga der vi har tilpassa organisasjonen. Vi kan no melde at vi har tilsett to nye medarbeidarar som starta på planavdelinga 1. september. Nøkkelen til effektive prosessar og raskare sakshandsaming er mellom anna gode og oppdaterte planar. Vi har prioritert ei stilling som spesialkonsulent Næring. Konsulenten starta i stillinga 1. september og skal vere kontaktledd mellom kommunen og verksemder, leie viktige utviklingsprosjekt og samarbeide med nabokommunar og Vestland fylkeskommune. Vi har også tilsett ny saksbehandlar Miljø og bærekraft.
Born og ungdom er også trekt fram som satsingsområde i organisasjonsutviklinga. Vi har mellom anna satsa på stillingar som Ungdomskoordinator i avdeling kultur, to stillingar som Miljørettleiarar i skulen og ei stilling som barnekoordinator tilsett i etat Helse og sosial som skal starte 1. januar. Vi arbeider også aktivt med å rekruttere til ulike stillingar innan helse og omsorgstenestene.
Vi har rekruttert ny HR-sjef oppstart 1. november og er godt i gong med rekruttering av ny kommunalsjef for Helse og sosial.
I denne perioden har vi hatt ekstraordinære utfordringar både med covid og krig i Ukraina som også skal handterast i tillegg til å gjennomføre det innbyggjarane forventar av Stryn kommune.
Vi har forståing for at innbyggjarane og tiltakshavarar er utolmodige, men det er viktig at vi gjev rom for ny medarbeidarar å kome seg inn i dei nye stillingane og bli kjend med kommunen. Resultata vil kome.
Vi legg også sterk vekt på at vi jobbar på tvers i organisasjonen og nyttar den kompetansen vi har til å løyse ulike oppgåver på beste måte.
Per Kjøllesdal
ordførar i Stryn