Via Ferrata i Loen har investert to millionar kroner i to nye og spektakulære «rutetilbod» med vanskegrad F på Hovenfjellet. Leiar i Loen Active, Erik Brendefur, vonar at dei resterande tilboda kan bli opna i løpet av august.
– Den nye F-ruta, Tors Hammar, vart teke i bruk i sommar. Dette er truleg Norges vanskelegaste Via Ferrata-rute og er berre for spesielt interesserte, seier han.
Opnar ny F-rute vestover
Den komande F-ruta, som vil gå vestover mot skyliften og opp, er venta å vere ferdig innan utgangen av august. Kva namnet på løypa skal bli, kan vere opp til deg.
– Dei som går den nye ruta får høve til å kome med namneforslag til oss, seier Brendefur som har stor tru på klatreruta som vil gå delvis parallelt under pendelbana til topps på Hoven.
– Klatrarane på denne ruta vil få ein rå opplevelse med tilskodarar i gondolane. Med dette blir vi enda råaere og kan tilby eit komplett Via Ferrata-tilbod, fastslår Brendefur.
Men det stoppar ikkje der. I tillegg blir det to nye ziplines i øvste del av Gjølmunne. Ein zipline på heile 135 meter og ein på 100 meter. Sistnemnde vil spenne seg 150 meter over bakken.
– Mykje skal godkjennast før vi kan opne desse, men vi skal opne dei i løpet av hausten, seier Brendefur.
Trur på ny besøksrekord i 2018
Via Ferrata i Loen kunne vise til besøksrekord i 2017 etter oppstart i 2012.
– I fjor hadde vi 5.100 gjestar som hadde med seg guide. 3.200 gjestar leigde utstyr. I tillegg er det om lag 4.000 personar som nytta Via Ferrata utanom. Med 15.000 gjestar var det tidenes sesong for oss.
På eitt år hadde vi ein auke på 70 prosent av gjestar som tok med seg guide, seier Brendefur som har all grunn til å tru på ny besøksrekord i år.
– Absolutt. Vi har 300 fleire besøkande i år enn på same tid i fjor, så det luktar ny rekord for oss. Det er stor aktivitet og aukande turisme i heile Nordfjord og Stryn og Loen spesielt. Vi merkar det sjølvsagt godt på besøkstala at Loen Skylift er i full drift, poengterer han.
Via Ferrata reknar sesongen frå 1. mai til 1. november.