Anders Fannemel må stå over rennet i dag:

- Misser ikkje motet og held fram med å jobbe

Jobbar vidare: I går fungerte det ikkje. - Men eg held fram med å jobbe med å finne tilbake teknikken som gjev dei lengste sveva, seier Anders Fannemel til Fjordingen.  Foto: Tadeusz Mieczynski

Nyhende

Det vert ikkje noko hopprenn i storbakken i Val di Fiemme i dag på Anders Fannemel. Med 106 m i kvalifiseringa i går kveld vart det ein trasig 53. plass, og honndølen må dermed sjå hopprennet frå sletta. Robert Johansson som best av dei norske med 130 m og 4. plass i kvaliken. Også Johann Andre Forfang, Halvor Egner Granerud, Marius Lindvik og Robin Pedersen kvalifiserte seg til rennet.

- Kva var det som ikkje fungerte, går det an å forklare det? Er det bakken du ikkje trivst i?

- Eg kan prøve å forklare i alle fall! seier Anders Fannemel til Fjordingen.

- Eg prøver å få meir energi i hoppinga for tida, så då forsøkte eg meg med litt endringar i køyringa i tilløpet. Samstundes hadde eg bytta litt sko og utstyr, det er trass alt nødvendig i løpet av ein sesong, og så fekk eg det ikkje til å funke. Dermed blei det ein dårleg dag i bakken, seier Anders Fannemel, som forsikrar at han ikkje misser motet og held fram med å jobbe med å finne tilbake teknikken som gjev dei lengste sveva.