Det gjekk eit 400 meter breitt snøskred i Kjenndalen mellom Kjenndalsstova og Kjenndalsbreen fredag. Skredet vart varsla kl. 13.30 og alle naudetatar møtte mannsterke opp.
Klokka 17.00 fredag opplyser politiet sin innsatsleiar på staden, John Endre Skeie, at tre personar, ein mann, ei kvinne og eit lite barn, vart lettare skada etter skredet. Dei var i ein bubil då skredet kom. Bubilen fekk store materielle skadar.
– Det er førebels for farleg å ta seg inn i rasområdet enno då er framleis er fare for nye skred. Vårt fokus er no å krysspeile informasjonen vi har for å sikre at fleire ikkje er teke av skredet, seier Skeie.
Det er pr. no ingen som er meldt sakna, men politiet vil vere i Kjenndalen til dei får oversikt.
– Måtte bryte bussen i revers
Om lag 20 personar skal ha blitt evakuert på austsida av det 400 meter breie skredet som altså delte dalen i to. Fleire ambulansehelikopter gjekk i skyttel til og frå rasstaden, opplyser vår reporter.
Det var også eit Sea King-helikopter på staden. Elveredningstenesten og ettersøkshund var på plass i Kjenndalen.
Stryn kommune sette krisestab kl. 15 fredag, opplyser ordførar i Stryn, Per Kjøllesdal.
– Etter meldingar frå politiet har dei no ein viss kontroll på situasjonen, men vi vil ha folk i beredskap utover kvelden om det blir naudsynt, seier ordføraren.
Snøskredet gjekk frå vestsida av vegen mellom Kjendalstova og parkeringsplassen ved Kjenndalsbreen som er ein populær turistdestinasjon.
Har du foto eller video av skredet? kontakt oss på tlf. 98244635 eller roger.oldeide@fjordingen.no