Det såg ut som ein hadde kome fleire tiår tilbake i tid når ein såg folket i Stryn sentrum laurdag med gamle treski, klede og klassiske norske ullgenserar. For tiande år på rad hadde folk funne fram treskia frå loft og kjellarar for å skape ein ny folkefest i Stryn sentrum.
56 born og 66 vaksne stilte til start i sentrumsløpet, men heller ikkje i år var plasseringar det viktigaste. Fleire heldt likevel eit tempo som fekk den tilkjørte snøen til å sprute.
Markus Olsen gjekk som eit olja lyn under barnerennet, etterfølgt av Olina Svarstad Heggdal. I vaksenklassa var det nok ein gong Nils Heggdal som gjekk raskast på treskia.
– Det var veldig godt føre, fastslo både Heggdal og festivalsjef Torstein Tvinnereim. Sjølv kom han på andreplass.
Leif Hoggen (89) stilte til start i sentrumsrennet. Han tok del for fjerde år på rad, trass i at han blir 90 år i år.
– I min alder er det viktig å halde kroppen i gong. Ein får heller ikkje meir moro enn ein lagar sjølv, sa Leif som igjen fullførte løpet.
Folkefesten var ikkje over etter at alle hadde gått i mål. Eit rikhaldig program vart etterfølgt av sagkonkurranse og fest i festivalteltet laurdag kveld.
Der vart det delt ut ei rekkje prisar, deriblant Treskifestivalen sin høgthengande heiderspris.
– Ikkje berre har Per Hatledal vore med på Treskifestivalen kvart år, men det er for alt han har gjort for skiidretten. Som ung var han ein av dei beste skiløparane i fylket. Vidare har han vore ein særs viktig trenar for fleire generasjonar med skiløparar, seier Tvinnereim.
Han legg til at Per Hatledal var sentral i oppstarten av skilinja ved Stryn vidaregåande skule.
– Han har og ei særs viktig rolle i oppbygginga av Ullsheim som no står fram som eit av landets beste skianlegg, seier Tvinnereim som hadde mange å takke.
- Skal ein få folkefest treng ein fyrst og fremst folk. Difor er det fantastisk kjekt at så mange har lyst å bidra på ein eller annan måte til folkefesten. Eg er djupt takksam for alle og einkvar som bidrog og stillte på, seier Tvinnereim.
Les også: Dette skal Stryn ha stor skryt for