Sjølv om klatreparken i Stryn sentrum har vore open sidan i sommar, vart han offisielt opna i går med høgtidleg og luftig snorklipping.
Det sørgde ordførar Sven Flo for då han klipte den raude snora- heilt oppe i toppen av anlegget.
- Vi er veldig glade for at vi har fått opp denne flotte klatreparken. Det har vore fantastisk å sjå kor mykje aktivitet det har vore her, sidan alt var klart i sommar, sa han. Han fortalde at dei hadde tenkt å vente med opne opp parken til skulestart, men på grunn av stor pågang måtte klatreanlegget berre opnast til bruk.
Dette har blitt ein realitet takka vere støtte frå fylkeskommunen, Sparebankstiftinga og i samarbeid med Stryn kommune.
- Dette skal vere eit lågterskeltilbod for alle, sa Odd Kjetil Tonning og gratulerte med opninga på vegner av Sparebankstiftinga.
Dei delte ut gratis is til borna, og etterpå var det ein uhøgtidleg klatrekonkurranse. Regnver førte til eit heller labert oppmøte i kulturhusparken, men aktiviteten i anlegget var stor blant ivrige born.
Stryn Musikklag stilte trufast opp i all slags ver, og sørgde for musikalsk svung over arrangementet.
