Det meiner i alle fall den røynde toppturentusiasten Frank-Jakob Sandbakk frå Stryn.
Med betre kjennskap til fjella i regionen enn dei fleste, bad vi han om eit tips til ein topptur som kanskje ikkje alle kjenner like godt til.
Han meiner Fedalsnibba på grensa mellom Stryn i Vestland og Stranda i Møre og Romsdal er ein slik topp.
– Denne toppen vil eg karakterisere som ei skjult perle. Fjellet har ei karakteristisk pyramideform bak toppen av den meir kjende Marsåhyrna i Oppstryn. Mange har nok lagt merke til toppen som er ganske markant mot nord om ein ser den frå rv. 15 gjennom Strynedalen.
Ein skitur opp dit byr på mange høgdemeter med mykje variert og artig skiterreng. Ein kan også velje alternative nedfartar, fortel han.
Startpunktet for turen er ved parkerings/snuplassen øvst på Flo. Følg skilting og spør eventuelt lokale om parkering.
– Ein følger så skogsvegen lett opp til Flofjellet. Oppe ved Angelsvatnet har ein Nedre-Flosætra på venstrehand og går flanken opp mot Marsåhyrna.
Her får ein eit artig og variert terreng i ein open småskog. Midtvegs i flanken er det to alternativ til topps. Enklaste alternativ er vidare opp til platået på Marsåhyrna og vidare mot den pyramideforma toppen. Her er det litt opp og ned og mindre interessant køyring ned att.
Den finaste ruta både opp og ned er opp Flofedalen. Ein kan følge denne nordover før ein går rett vestover opp den store flanken til topps. Ein kjem då inn på toppryggen frå sør. Her må ein vere obs på store skavlar mot aust og nord så ein bør ha god sikt ved toppstøyten, fortel han.
Frå toppen har ein panoramautsikt mot Sunnmørsalpane, Jostedalsbreen og heilt ut til kysten.
– Ned att er det berre å nyte aust-flanken som ofte har svært bra snø ned til Flofedalen og vidare ned artig skogsterreng til Flofjellet.
Sidan fjellet er så lite besøkt er det aldri oppkøyrt her. Ver obs på ein del hamrar ned mot elva Fedøla, rår Sandbakk.
Totalt er turen om lag 14 km lang og ein må berekne mellom 4–6 timar tur-retur.
– Ein må studere kartet på førehand og skredfaren må vurderast då både nordre del av Flofedalen og opp frå Nedre-Flosætra kan vere utsett for skred på dagar med skredfare. God tur.
Fem «trygge» toppturar
Audiens hos dronninga i Olden
–Majestetisk utsikt frå 1.771 høgdemeter